محمد خلف الشمري : يكتب يا من عين الضالة جزاه الله خير !

يالله حيييهم فر دلة القهوة ياراجو على حبايبي وخصوصا ابو الشباب اللي له معزه خاصة عندي قالها الشايب .
الشاب : الله يجزاك خير ياحجي اشكر تواضعك الجم اللي ماله حدود ولا مراكز .
الخبير : باشا باشا ياعمونا ابو الشباب عم الحاج اقطع ذراعي ان عنده حاجه وعاوز يسألك فيها .. اكمني عارفه وعاجنه وخابزه .
الشايب : بعد ضحكه طويله قال الله يهديك ياخبير تري المحبه من الله بس انت يتهيألك حاجات ومحتاجات ماهي وارده ببالي .
المعاق : اضم صوتي لصوت الخبير .. يا حجي هاتها من الاخر تري حركاتك مكشوفه ! .
الشايب : اعوذ بالله منكم حتي المحبة حطيتوا فيها عذاريب الله يسامحكم ويسامحني .. والله يابو الشباب الليله معزوم على عرس بوحده من هالقاعات بس مادري وين ألقها ؟ .. يا من عين الضالة جزاه الله خير ! .
الرجل : بمكانهم وحده بالجهراء وثنتين بالصليبخات .. الله واكبر وش هالعياره تبي تقنعنا انك ماتعرفهم ولا تدلهم ؟ .
الشايب : هذولي يابو الفهامية صالات الافراح بس انا سؤالي عن القاعات الشلاعيه اللي كل يوم لها بمكان .. الواحد مايصدق يدلهم ثاني يوم غيروا مكانهم .
الشاب : والله الحجي عنده حق ! .. القاعات يامحفوظ السلامة استقرت بالساحة اللي خلف مرور الجهراء وابشرك كلها نصبوها وراح تلف بينهم لين يخيب ثناك على ماتلقي اللي تبي من زحمة السيارات .
الخبير : خبر ايه يا ابو الشباب هيه مش ليها مكان محدد ؟ .
المعاق : لا والله كل كم شهر يرحلونهم من مكان لمكان يوم بين الصناعية والنسيم .. ويوم ثاني وراء الصناعية على الدائري السادس .
الرجل : وقبل حوالي السنترال ومرات بجانب المطافي .. والمره الجاية مادري وين يبون يقلعونهم ؟ .
الخبير : متهيألي اللي بتتكلموا عليها هي الخيام ؟ .. طب والبلد ناقصها ايه ماتعملش صالات كفاية للافراح حتي يرتاحوا الناس ؟ .
الشاب : بعد ضحكه طويلة ياخبير الحكومة الشعب مو ذات اهمية عندها ! .. إلا قول ليش مايخلون القاعات باماكن مخصصه وياخذون عليها ايجار ؟ .
الرجل : فكرة طيبة ويخلون كل قاعتين بمكان من ساحات الجهراء .. ونفس الكلام ينطبق على القاعات الثانية بالكويت بكل المناطق المحتاجه .. على الاقل نفتك من الفرفرة على هالقاعات لين تطيح على اللي تبي وانت لقيتها تمشي مسافات طويلة بهالظلمه ماتدري وش تدوس عليه .

المتمولس :شلون تعرف ان الاسباني متخرفن على بنت بقروب وتساب او تويتر او انستغرام ؟ .. لمن يرد عليها (لووووووول) وهي كاتبة صباح الخي .. وعند ضحك الحضور رفع على مسامعنا الشيخ زغلول اذان الظهر .

محمد خلف الشمري

المصدر

_____