محمد خلف الشمري : يكتب متي نقول لا بدل من نعم ؟

شوارعنا هي مالها والي يتابعها ويحافظ على صيانتها ؟ .. لانها بصراحة كسرت سياراتنا اللهم ياكافي مايطوف اسبوع والا انا زبون بكراجات الصناعية يوم تبديل تواير ويوم الشيالات منكسره وكل مره اعمله وزنيه قالها الرجل .
الخبير : ياعمي الباشا دي ضريبة العربية .. وان كنت مش قادر عليها بيعها وخليك زي حالاتي من جوال الي وانيت والسلام عليكم .
الشايب : واعيباه كويتي تبيه يتنطط من سيارة لسيارة عاد هذا كلام ! .. إلا هذا له محض افتراء ! .
المعاق بعد ضحكه قال : اموت واعرف منين وشنهو اللي قاعد تقوله ياحجي وش هالكلام النحوي اللي نزل عليكم مره وحده .
الشايب : ماكو إلا كل خير هالكلام لقته من مقابل الاخبار والبرامج السياسية توالي الليل .
الشاب : الله يهديكم وراكم ضيعتوا سالفة الرجل خلوه يكملها خلونا نفهم بعيدا عن المهاترات اللي ماوراها نفع غير الحساسيات والجفاء بين الاصحاب .
الرجل : السالفة ومافيها بعض شوارعنا الرئيسية مكسره ومحفرت الشارع منهم تلقاه حارتين تشوف نص الحاره محفر ومليان ماء .. وخصوصا الشوارع اللي تحف بعض المنازل .. الله يهدي سكانها جنهم قاعدين على ضفة نهر الماء طالع من بيوتهم على مدار الساعه وبدل ماينزل بالبواليع اعزكم الله على طول للشارع .. والله شي يحير هالتجاوز من المسئول عنه هل هم وزارة الكهرباء او وزارة الاشغال ؟ .. وهل عندهم ضبطيات قضائية يخالفون من خلالها المخالفين ؟ .. ان كان لا فهذي مصيبه وان كان فية فالمصيبه اعظم لان اللي صاير اهدار للمال العام .
الشاب : ان اعرف ان وزارة الكهرباء والما عند بعض موظفينها ضبطيات قضائية وانهم يعملون على مدار 24 ساعه .. وقبل كم يوم قريت عنهم موضوع بانهم شانين حملات وزعوا من خلالها عشرات الملصقات بعد كم انذار شفهي بمختلف مناطق الكويت وكل هذا لمتابعة هدر المياه وسرقتها .
الرجل : كلام طيب بس الظاهر ان شغلهم على مشتهاهم ؟ .. لا مو معقوله ماشافوا اللي انا اشوفه كل يوم ؟ .
الشايب : شايفين وساكتين ان رفعتها فهي بالشارب وان طمنتها جت باللحيه .
الخبير : شوفو الحاج بيقول ايه .. شارب ايه ولحية ايه ؟ .. ده تطبيق قانون مش عزومه على خروف ياحضرة بردو ده كلام ؟ .
المعاق : الخبير عنده حق بكل اللي قاله لازم ينبطق القانون على هالناس اللي بس ماها يصب بالشارع ليل ونهار لان الماء ثروة وطنية يجيب علينا المحافظة عليها واللي مايحافظ عليها لازم يتطبق عليه اقسي العقوبات .
الشاب : ولي اضافة ان سمحتو لي على كلام حبيبي المعاق .. السكوت عن هالتجاوزات راح يسبب زحمة بالشارع لان السيارات راح تكون بحارة وحده .. وهذا غير كل يوم والثاني وزارة الاشغال تسفلت فيه وثاني يوم يرجع مثل ما كان حفر يعني هي هي .. انا اقول تطبيق القانون مايزعل .

المتمولس : اكثر الاخطاء التي يرتكبها الانسان في حياته كانت نتيجة لمواقف كان من الواجب فيها ان يقول لا بدلا من نعم .. وفي هذه الاثناء رفع على مسامعنا الشيخ زغلول اذان الظهر .

محمد خلف الشمري

المصدر