فرقنا ياهي تمصخرت ! - بقلم : محمد خلف الشمري

فرقنا ياهي تمصخرت ! - بقلم : محمد خلف الشمري


محمد خلف الشمري

في بداية الاستعدادات للموسم الرياضي الجديد وقبل لا اي لاعب يقدر يفتح (سبرنت) جتنا الاخبار على النحو الآتي: العربي انهزم بالثلاثة والكويت مو احسن منه هم بعد عادها وانهزم بالثلاثة .. وجاء نادي كاظمة وعماها وانهزم بالأربعة والسالمية جاء يكحلها وشال اربعة!.. وكل هالهزايم مابينها وبين بعض إلا كم يوم او يوم وترك وكلها قبل العيد يعني كل الفرق اللي باروها عيدت عليهم بأحسن عيادي واهلا اهلا بالعيد العيد فرحة هيييييه .. وياسبحان الله ومن محاسن الصدف كلها جت على ملاعب دولة الامارات .. اييييه ليش وش جاهم ربعنا ؟ .. ليش وش صاير لهم علشان تصير هزايمهم مجلجلة بالشكل هذا ؟ .. هذا غيض من فيض اسئلة تدور براس الواحد ياااربي وش حادهم يمرمطون روحهم بالشكل هذا ؟ .. نجد ان السبب الاول والاخير لهذا هو سفره ببلاش مدفوعة الاجر من تذاكر ومواصلات وسكن وملاعب تدريب وين ووين يلقون مثل هذي العروض ! .. الله عليكم وعلى تفكير مدربيكم ومسؤوليكم يا بشر عمركم سمعتم عن فرق تلعب دورات ودية رسمية في بداية مراحل الاعداد ؟ .. من ناحيتي انا لا واللي مو مصدقني يشوف آخر اخبار الفرق الاجنبية اللي اغلبها راح لدول آسيا علشان يفكون عضلاتهم ويتمرنون على فرق شرق القارة وخير دليل هي النتائج اللي من الخمسة وفوق .. يعني نفهم منهم انهم يتدرجون بالاستعدادات من الضيف للمتوسط لين وصلوا الى المباريات الودية القوية اللي يعرفون من وراها نقاط ضعفهم وقوتهم يعني زبدة الكلام بالتدريج .. على العكس من اللي طلعت فيه فرقنا هالموسم من تقليعة جديدة شارك وترزل وتمصخر وعقبها ارجع للكويت وعيد واضرب بالخمس غديان وعشيان وبعدين اجمع لاعبيك الهواة وانطرمحترفين يردون من اجازاتهم الجديدة واطلع فيهم معسكر استعدادي لبداية الموسم الجديد .. وقبل الختام راح ابعث احر سلام للعقول السطحية اللي تفكر ببعض انديتنا وأقول لهم والله ماقصرتوا.
ألووو اخير: علماء يابانيون يبتكرون تقنية جديدة لتحويل سطح المياه في حوض الاستحمام إلى شاشة تعمل بنظام اللمس .. وحنا بعض انديتنا تشارك بالدورات قبل الاستعدادات.