أولي هونيس كويتي بقلم : محمد خلف الشمري

املح : مساك فل وياسمين يا اجلح يا اخوي عساك بخير طمنئ عنك وعن الانجال ؟ .
اجلح : بخير لله الحمد اشوفك اليوم لابس بدلة وتقول كلام ماهو بقاموسنا الكويتي وش تطلع انجال ؟ .
املح : الانجال يعن العيال ومفردها نجل اي ولد .. بس ما قلت لي وشرايك بالبدلة ؟
اجلح : اترك عنك البدلة والانجال ابي اسالك تعرف أولي هونيس ؟ .
املح : ايه اعرفه واعرف عايض وطارق واخوه سامي .. أولي هونيس رئيس بايرن ميونخ الالماني يالشريك عيب عليك هذا سؤال احد يساله لواحد مثلي .. اخوك بلا فخر موسوعه إلا ربع بالمعلومات الرياضية خير اشفيه بكنباور ورومنيغه اكيد سوو عليه ربيع عربي ! .
اجلح : لا لا يابن الحلال الثورات والانقلابات تخصصنا احنا يا امة العرب وياليتها جايبه نتيجه ! .. السالفة ومافيها الرجال استقال من رئاسة البايرن .
املح : استقال استقال استقال هالكلمه من زمان ماسمعتها ! .. لان جرت العاده اللي يقعد على كرسي ما يهده إلا بطلعة الروح وبتسجيل ناس اكثر واكثر يصوتون له بانتخابات الجمعية العمومية .. خير و شعنده استقال ؟ .
اجلح : استقال بعد ان ادانتة المحكمة وحكمت عليه بالسجن لمدة ثلاث سنوات ونص بتهمة التهرب من دفع الضرائب .
املح : بعد ضحكه طويلة انا عندي احساس ان بالموضوع (بلاسه) اكيد حفروا له اعضاء مجلس الادارة وطيروه والا المحكمة وشدراهم عن تهربه الضريبي ؟ ! .
اجلح : اللي دراهم هو علم على نفسه بعد ان عذبه ضميره بانه يخون بلده بعدم تدفعه للضرايب .. وازيدك من الشعر بيت بعد طلب من محاميه انه مايستانف حتي يرتاح ضميره .
املح : عاش ابو ضمير هذا لو انه عندنا يخرب بيته وسوا هالعمله جان سموه مهبول وداشر كلاب (اعزكم الله) وعياله حجروا عليه وجابوا لهم كم شاهد وتقاسموا الحلال ! .
اجلح : هذا عندنا هالكلام بس هالناس عندهم ضمير وحب لبلادهم واخلاقهم اخلاق الاسلام وهم ماهم مسلمين يعني عكسنا ! .
املح : الله ياكثر مانبي من شاكلت أولي هونيس بهالبلد لان القرعة ترعي على كيفها بلا حسيب ولا رقيب كل واحد يقول احنا وشعلينا دام الطق ما جاء صوبنا .. والله كم انت كبير يا أولي هونيس وياليت نشوف واحد مثله عندنا بالكويت .. ههههه ادري اني احلم وبالمشمش تصير عندنا بالكويت بس الاصابع ماهي سوا وسلملم صادوه أولي هونيس .

ألووو اخير : شر الشياطين من يظهر لك في ثوب ملاك  .

عاش اولي هونيس