"مراجعات وين اذنك يابو الاحباش "! - بقلم : محمد خلف الشمري

"مراجعات وين اذنك يابو الاحباش "!

بقلم.. محمد خلف الشمري


"ياجماعة الأيام الاخيرة اشوف مشاركات المعاق قليلة مو مثل أول... وكثر غيابه عن ديوانيتنا عسى المانع خير يابوك" قالها الشايب.

الشاب: "هو من كثر بيزاته اللي اخذها من هيئة المعاقين, وهو متغير علينا يمكن شاف روحه علينا"؟
المعاق: "لا والله انتم بالقلب وغالين علي بس الدنيا كلها مشاغل روح وتعال ما تخلي الواحد يفضى وان فضي يصير ماله خلق يتكلم".
الخبير: "يبقى كلام الشاب حقيقي الاشيا بقت معدن... اللي اداك يدينا ياعم والله انا عيني باردة ماتخفش منها ياراجل دانا بغبطك مش بقر عليك اوعى تاخذ الموضوع بحساسية".
الرجل: "إلا عيونه تهبا تراه يطيح الطير اللي طاير... ههههه وان بغيتو ادليل اقوله" .
الخبير: "ياباي عليك انت فضيحة النوبة اللي جايه مش هقول لك أي حاجة اه منك يابو عيون زايغة .
المعاق: "هههههه كلن على همه سرى وانا على همي سريت".
الشايب: "افا يا ذا العلم رقابنا سداده لك بس امرنا وحنا عند وجهك مالك شغل بمزوح الربع".
المعاق: والله والنعم بكم وهذا العشم فيكم بس انا سالفتي سالفة اللي عمره ماتبخر تبخر واحترق ... انا بعد هالخير اللي نزل علي من هيئة المعاقين انصبت بمصيبة ماهي بالبال ولا بالحسبان... وارجوكم لاتقاطعوني لاني راح اقولها بالتفصيل الممل .. انا قبضت القريشات من صوب وام العيال طاحت علي بمرض الله يبعده عنكم وعن كل مسلم انصابت بعيوانها وبعد مراجعات وحب خشوم سفروها اخوانها للخارج ويوم جتهم قالو اخلاص مالها حل ارجعوا فيها والله يكون بعونها وبعون عيالها لله الحمد رضينا بالمقسوم وهذا ابتلاء من الله .. قلت لها مدام مالك امل بعيونك راح اقدم لك على المعاقين اللي اعتمدوا اوراقها باعاقة شديدة لان مالها امل بالنظر اللي كان كل ماله يختفي .. عيال الحلال عطوني لستة طلبات ملزوم اجيبها لهم علشان يمشون لها اعانة شهرية (جزاهم الله خير الحكومة) قمت انا ياهالمعاق الحركي اراجع لها اجمع الطلبات اللي ماتنتهي .. ومن هالطلبات ورقة طلعت لنا اكبر مشكلة وهي ورقة لمن يهمه الامر من التأمينات تثبت ان مالها معاش ولا هي مشاركة بالباب الخامس ابو الرخص التجارية... مرت ثواني ووراها دقايق طويلة قالوا فيه عندك مشكلة قلت شنهي قالوا الميلادية مافيها اسم القبيلة قلت بالبطاقة والجنسية موجودين قالوا كلامك صح بس هالكلام مايمشي روح عدل الميلادية وتعال... ماطولها عليكم رحت اجر حديد عكازاتي لوزارة الصحة قسم الميلاديات وقلت له طلب التأمينات قالوا نبي صورة جنسية ابوها المتوفي .. قلت منين اجيبها والرجال متوفي قبل لا اتزوجها قالوا مشكلتك دورنا عند اهلها ماكو شي... المهم جبنا اثبات جنسية من الادارة وبعد خمسة ايام راجعتهم على حسب الموعد قالوا روح عدل النسب بوزارة العدل وخذ معاك كل الاوراق الثبوتية ومعها عقد الزواج وطابع وبعد شهرين تنطر الحكم وهاه ترى يمكن يطلبون شهود علشان يكون عندك علم... وبعد هالسالفة يارب تكونون عاذريني علي غيابي وسرحاني ببعض الايام بمجلسكم الطيب.

الشايب: لا والله معذور ولا بارك الله بالروتين جانه مطينها معاك .. الله يعينك هههه بمراجعات وين اذنك يالحبشي وهذا وانت معاق اجل وش يصير بالصاحين اكيد يشوون على اذانهم البصل, وين تسهيل الامور للمعاقين ماكو اي حنية او عطف عليهم لاحول الله معاملتهم معاملة الاصحاء بهالدواير الحكومية بالله ماتقولون لي وش خانت قانونهم وهم يتبهدلون هالبهدله... ههههه الظاهر كل همهم بس عطوهم فلوس وبهدلوهم ومنا الي من يهمه الامر الرحمة حلوة.

المتمولس: هههه والله حاله مادري ليش بمسلسلاتنا المحلية اذا الواحد عطوه فلوس يقول شنهو هذا ... هذي فلوس شنهو لايكون على بالك شده بقدونس هههههه , وفي هذه الاثناء رفع على مسامعنا الشيخ زغلول اذان الظهر.


المصدر

"مراجعات وين اذنك يابو الاحباش "! - جريدة سبر الالكترونية

اي بالله الرحمة حلوة

شكرا على المقال الرائع

هههههههههههه

الله عليك على الكلام الذي يتحدث عن الواقع

المتمولس: هههه والله حاله مادري ليش بمسلسلاتنا المحلية اذا الواحد عطوه فلوس يقول شنهو هذا ...
هذي فلوس شنهو لايكون على بالك شده بقدونس هههههه