مسابقات دلع وزيتونة ! - بقلم : محمد خلف الشمري

مسابقات دلع وزيتونة ! - بقلم : محمد خلف الشمري

اليوم عندي سالفة عجيبة غريبة "مادري تحت اي بند اسميها" قالها الشاب ثم اضاف: "جتني رسالة مثل كل هالرسايل اللي تجي خلق الله خلال ايام رمضان اعاده الله علينا بكل خير! وهالرسالة حالها حال رسايل شارك واربح سيارة ودولارات وتلفونات, قلت بنفسي خل اجرب حظي, وادخل مغارة علي بابا, لعل وعسى أفوز بشي, ومع اول رسالة جتني مكتوب فيها دلع وزيتونة يعود برمضان ومعه تعود فرص ربح سيارات واجهزة غلكسي "اس 4 " ونوت وجوائز نقدية كلها تنتظرك رد بكلمة زيتونة حرف "ل" بـ 500 فلس الرسالة ... ماصدقت خبر وارسلت زيتونة "ل" وانا قاعد احلم اني اسوق سيارة فايز فيها ... ماطولها عليكم جت رسالة مكتوب فيها دلع وزيتونة 2013 اجب وزد فرصك للفوز "ل 1" من اكلات رمضان في الكويت 1- الكسكس 2- الهريس ارسلت الاجابة برقم 2 جت رسالة منهم صح فرص : "1ل1" ممثل كويتي 1- عبدالحسين عبدالرضا 2- هاني رمزي جاوبت برقم 1, جتني رسالة صح فرص : "2ل1" لقب المنتخب الكويتي 1- الازرق 2- الاخضر جاوبت برقم 1 جتني رسالة صح فرص : "3ل1" ممثلة كويتية 1- هالة صدقي 2- سعاد عبدالله جاوبت برقم 2 جتني رسالة صح فرص : "4ل1" اول منتخب عربي يفوز بكأس آسيا 1- قطر 2- الكويت جاوبت برقم 2 جتني رسالة صح فرص : "5ل1" متي تأهلت الكويت لكاس العالم 1- 1982 2- 1994 جاوبت برقم 1 جتني رسالة صح فرص : "6ل1" مدينة بالكويت 1- زحله 2- حولي جاوبت برقم 2 جتني رسالة صح فرص : "7ل1" اين يقع القصر الاحمر 1- الجهراء, السالمية جاوبت برقم 1 جتني رسالة صح فرص : "8ل1" تحد دولة الكويت جنوبا 1- قطر, 2- السعودية جاوبت برقم 2 جتني رسالة صح فرص : "9ل1" سمي جزيرة كويتية 1- فيلكا 2- بالي جاوبت برقم 1 جتني رسالة لا "اشلون لا " "ل1" اكبر جزيرة كويتية 1- ام النمل 2- بوبيان جاوبت برقم 2 جتني رسالة لا "ل1" ايهما اصغر مسافة ؟ 1- السعودية 2- الكويت جاوبت برقم 2 جتني رسالة صح فرص : "10ل1" من مؤسسين منظمة اوبك 1- الكويت 2- المغرب جاوبت برقم 1 جتني رسالة لا : "ل1" ايهما اقل سكان 1- الجزائر .. 2- الكويت جاوبت برقم 2 جتني رسالة لا "ل1" اللغة الثانية بالكويت 1- الانكليزية 2- الالمانية فتحت حلقي وانا كلي استغراب من هالمسلسل الممل الطويل من الاسئلة وانا اقول بس خلاص ماني مجاوب الظاهر ان السالفة مطولة طنشت ماخذت شوي جتني رسالة جديدة كان رقمها 15 لا "ل1" استاد جابر الدولي 1- قطر, 2- الكويت قلت ألحق نفسي لا يطير باقي المعاش وحنا على وجه عيد طلعت من الرسايل ووضعيتها المنيلة بستين نيلة وسكرت التيلفون بكبره حتي لو يدق ابن امه ماني راد لان النفسية صارت زفت, اجلكم الله لان النتيجة معروفة 1 في المية يتصلون و 99 بالمية طناش" .
الشايب : "زين سويت ! بس وشلون تجاوب صح ويقولون غلط"؟
الشاب : "بعد ضحكه طويلة علشان يطول الحوار وتكثر الرسايل وهات ياخصم به الانصاص نص وراء نص, لا والمصيبة يوم شغلت التيلفون ثاني يوم جتني رسالة منهم مكتوب فيها قد يرن هاتفك جاوب على السؤال التالي ... بالله ماتقولون لي شنهو الحل هالحين ابي الفكة منهم, وهم مصرين يرسلون تكفون خلصوني منهم".
الخبير : "ياعم غير الشريحة واشتري راحتك"!
المعاق : "بس تغير الخط و اللا تسكيره ماهو حل"!
الرجل : "يعني وشيسوي الشاب ووين يروح ووين يشتكي؟ اتق الله بجيوبنا وقبل الختام تكفون اعزائي القراء اللي عنده الحل يراسلنا علشان نشوف الحل لشاب الديوانية, هو والرسايل اللي تجيه كل ساعة, وانا كلي اعتقاد ان الكثيرين انصادوا مثله بس ساكتيين ... لان السالفة طلعت ضحك على اللحى, لاعبني والاعبك يمصون اللي بجيبك وانت مصدق يعني السالفة مالها وصف غير غير خذ من جيبه وعايده".
المتمولس : لمدة ثلاث ساعات ضيفني واضيفك مباشرة واللي ماضيفه ينبهني ... ومع ضحك الجميع رفع على مسامعنا الشيخ زغلول اذان الظهر".


كاتب كويتي

[email protected]