فيروس الشغب يضرب الكرة الكويتية بقلم : محمد خلف الشمري

( فيروس الشغب يضرب الكرة الكويتية ) عنوان بالخط العريض قريته امس بالصفحة الرياضي لجريدة البيان الاماراتية وتحته صورة بالالوان للاعب (مضطجع) على سرير المستشفي .. بصراحة صورة تغني عن اي كلام وهي بعد مبارة للمراحل السنية بين ناديا الكويت والفحيحيل وهالخبر نقلته خص نص للجنة الانضباط اللي نايمه بالعسل وين ووين يطلع منها قرار وان طلع يكون مخفف غير رادع .. الناس بدول العالم قاموا يتناقلون يوتيوبات هوشا فرقنا وهم بعد الهنا بسنه يصدرون قرار .. خلاص يكفينا فضايح ألم او حتي مالبورو ياتي اليوم اللي فيه تكون قراراتكم رادعة تقطع عرق هالمشاكل وتسيحه ؟! .
***
- شر البليه مايضحك هالكلام ينطبق على تفكير بعض صحفينا وعلى تفكير اهل نادي القرين بعد مشاركة الفريق ببطولة الخليج للاندية بكرة اليد بدلا عن نادي القادسية اللي انسحب من البطولة .. قال ايه الفريق خرج من الدور الاول بخسارتين وتعادل والجماعة يقولون ان الفريق حقق بعض المكاسب وياتي على رائسها بروز اسم الكويت في هذا المحفل الخليجي المهم اللي ما غابت عن منذ سنوات .. الله عليكم تصدقون هالنقطة كانت غايبه عن بالنا من زمان ! .. بالله هي من متي فرق الكويت ببطولات الخليج تدخل من اجل كمالت العدد ؟ .. هالكلام ماسمعنا عنه إلا هالمره وش السالفة ؟ .
***
- موضوعي الاخير لهذا اليوم كتبت عنه اكثر من مره بس الظاهر ان عمك اصمخ بصحافتنا المحلية والعربية بشقيها الورقي والالكتروني .. وهو يتعلق بنقل الاخبار الشخصية للنجوم العالمية من مغامرات عاطفية وعلان مرافق فلانه وعلانه عشيقة فلان والصور ماباقي إلا تتبروز واللاعب المشهور جاه ولد وانكر ابوته ووو .. بالله عليكم حنا وش لنا باخبار مغامراتهم العاطفية المنحطه والله عيب عليكم نقل هالاخبار شنهو انتم ناسيين ان حنا مسلمين ودينا حرم العلاقات المشبوهه هذا للعلم اللهم اني بلغت اللهم فشهد .

ألووو اخير

اللهم اني اسألك الجنه وماقرب اليها من قولا وعمل واعوذ بك من النار وماقرب
اليها من قولا وعمل .